Inkhawmpui a tiak ta

Kohhran Hmeichhe Inkhawmpui Lian Vawi 44na chu a tiak ta a. Naktuk(Monday) hian Palaite mahni khaw lamah an haw tawh ang. Zanin (Pathianni) zan Inkhawmah khan Kum 2011-2012 Central Kohhran Hmeichhe hruaitu turte Hlanna hun hmn a ni a. Mizoram Synod Moderator Rev. C. Lalsangliana'n Pathian hnenah a hlan  ani.

Information Office atangin Inkhawmpui Lian Minute an sem chhuak lai

Inkhawmpui hmangtu zawng zawng hi Recieption lamin an chhinchhiah theih chinah Inkhawmpui Palai riak lut zawng zawng hi mi 4186 an ni a, lang a lokal, inkhawmpui chhimtute hi mumal taka chhinchhiah theih an ni alo a, mi 300 chuang Chaw eina hmun tur hrelo Recieption a in report an awm a, heng bakah hian in report lo langa Inkhawmpui rawn chhim hi mi 1000 vel awm tura ngaih a ni.

Naktuk hian Pandal ah Inkhawmpui hmanna hnuhma senghawiin a thlengtu lamte hnatlangin an thawk ang. Inkhawmpui tluang taka min hruaitu Pathian chungah lawmthu kan sawi e.

Inkhawmpui boruak a hlimawm zel

Inkhawmpui boruak a nuam sawtin Pathian Biak Inkhawm pawh a nuam sawt hle. Pathian faka zaiho a nuamin thlarauthianghlim hnathawh pawh a lang mek zel niin a lang. Zaiho a nawm rualin zai nan hun kan nei tlem emaw tih mai turin a khamawm loh thin hle.

Kohhranho te tawngtaina Pathianin min chhanna a lang chho mek zel a. He inkhawmpui tluang taka hman a nih zel theih nan Kohhrante tawngtaipuina kan mamawh reng a ni.

Pathian Biak Inkhawm ban hnu pawhin Pandal tualah Taksa chetna changte kawtlai vaivut pawh pawisa theiloin an tul a. A then an tlankualin thenkhat an bawkvak bawk a. Pandal chhunglamah pawh lamtual a te tan hle.

Vawiin (Dt.4.3.2011) thleng khan mikhual lothlen belh an awm zel a, tarlan tawh angin tunah hian Inkhawmpui Palai riak lut hi kan pung chho zel a ni.

Central Kohhran Hmeichhe sum dinhmun leh 2011-2012 Budget

Sum dinhmun tarlan hmain thu pawimawh zual tarlang lawk ila. Nakum 2012 hi Inkhawmpui neih loh kum tur a ni a, Tlangnuam Presbyterian Kohhran Biak In ah Inkhawmpui Lian Committee a thu ang. Hemi hma hian Kum 2013 Inkhawmpui Lian thlen dil duh chuan dilna thehluh theih a ni.

Inkhawmpui Lian Treasurer Pi C. Lalhmangaihi’n report a pek danin 2009-2010 chhunga Sum hmuh zawng zawng hi Rs.56,69,373.00 a ni a, Sum Hman ral zawng zawng chu  Rs. 37,01,206.00 a ni. Tichuan tunah hian Balance Rs.19,68,167.00 an la nei a ni.

Inkhawmpui Lian Committee chuan Kum 2011-2012 Budget atan Rs.26,45,000.00 a pawm.

Khawmpuiin Hmeichhia Nemngheh an duh

 Zoram Hmeichhe Inkhawmpui Lian vawi 44 na neih mek ah tukin zing dar 6:00 atanga tlai dar 3:00 thleng khan Kawnpui Hmarveng Presbyterian Kohhran Biak In ah Palai 386 ten Ro an rel a; Palai ten Hmeichhe nemngheh Minister neih tawh an duh.
    Aizawl ramhlun North Bial atanga thu lut, Presbyterian Church of India hnuai ah hian hmeichhe Theology Degree nei, a awm leh phu te chu Pastor / Minister atan nemngheh (Ordain) theih ni ve rawh se tih Palai ten an sawihona ah lungrual takin Palai ten an pawm a; Central Kohhran Hmeichhe hruaitu pakhat chuan Mizo hmeichhia zingah mithiam tak tak, rawngbawlna pawimawh taka hman an tam tawh a; kan rawngbawlpui Kohhran ten Nemngheh an neih theih tawh laiin Presbyterian Kohhran hian Hmeichhia kan nemnghet ngai lova; Nemngheh leh nemngheh loh hi Kohhran anga rawng kan bawlpui ten an ngaihdan a danglam thin a; kan Kohhran ah pawh hian a tul tawh a ni a ti.
    Thurel langsar zingah Bial Buhfaitham Ziaktu Term kum hnih ni thin chu Bial Puipa te Term anga kal rawtna te; Bial Hruaitu Nominate Kohhran tin inzat theuha siam aia Kohhran member zira siam rawtna te chu Synod Executive Comt ah thlen te; Bial Hmeichhe Inkhawmpui hun inang hman te; Women Centre Special budget atana cheng Nuai 7.2 dah te an passed a; Inneih sawngbawl dan hautak lo chungchang sawihona chu Synod Social Front hmalakna zawm turin an inchah a; Mizo hmeichhia te incheina chungchangah pawh Synod thuchhuah behchhanin Central Committee in hma la se an ti bawk.
    Rorelna Floor ah hian Pastor Bial 16 te thu theh luh chhawp chhuah a ni a; Bial 20 te thu thehluh erawh chu Central Comt in hrilhfiahna siamin Floot ah a chhawpchhuak lo.
     Kum 2011 - 2012 chhunga Kohhran Hmeichhe budget atan cheng Nuai 26.45 an Passed bawk.  A hmanna tur pawh an siam nghal. Zanin Inkhawm ah Jubilee hawnna neih a ni a; naktuk ah Jubilee Pual inkhawm neih a ni ang a; Synod Moderator in present a hlan ang.
Hruaitu  thar
Central Hmeichhe hruaitu
Chairman : Pi Laltlanmawii Chanmari Bial, Synod ruat
Vice Chairman :
Pi Khawlvuani,  Hlimen Bial
Gen Secretary : H Lalpianthangi Asst Coor     Synod ruat
Asst Secretary : Pi Laldawnkimi Ramhlun Bial
Treasurer : Pi Lalsawmliani Bawngkawn Bial
Fin Secy : Pi Liankimi Missionveng Bial
Mikhual  zat
Reception lamin an chhinchhiah danin riak lut Palai 3800 vel an ni.

Inkhawmpui palai lothlen tawh dan leh thunawi tlem

Inkhawmpui atan hian Counter 10 siam a ni a, hei bakah hian Khaw dai ah chhim lam leh hmar lamah Advance Counter siam ve ve a niin, Main Counter pakhat nen Counter zawng zawng hi 13 a ni. Chung Counter hrang hranga Nizan(Ningani)zan thlenga Palai lo thlen tawh dan chu hetiang hi a ni:

Counter No-1: Palai 225
Counter No-2: Palai 221
Counter No-3: Palai 186
Counter No-4: Palai 320
Counter No-5: Palai 240
Counter No-6: Palai 380
Counter No-7: Palai 308
Counter No-8: Palai 205
Counter No-9: Palai 220
Counter No-10: Palai 243
TOTAL: Palai 2548

Inkhawmpui Palai lokal tura beisei hi Bial 175 an ni a, tunah hian Bial tlem a zawng lo la thlenglo an awm. Tin, Bial zatah hian kumin a Synod in Bial a hawn tharte chu an awmna hmasa Bialah chhiar tel an ni.

Inkhawmpui Palai khual atanga lokalte zingah Kawnpui lo thleng hmasa ber chu  Tangkanemi Maubawk Bial a ni a, February Ni 22 (Thawhlehni) tlai Dar 3 khan a lo thleng a, Counter No-4 huam chhungah a thleng a ni.


Tin, Kan Inkhawmpui pandal ah hian Tube light point 236 dah a ni a, Stage en tur hian Sodium light 4, Halogen Light 2 leh Search Light 2 dah a ni. Tin, Inkhawmpui chhung a Pandal a Sound System kan hman tur hi Dawrpui Vengthar KTP ta a ni a, Rs.50,000.00 in hawh sak an ni.

Inkhawmpui Lian Programme tlangpui

Nizan atang khan Inkhawmpui hi Pandalah hman tan a ni a. General Secretary hnen atangin Report ngaihthlak a ni. He Inkhawmah hian Durtlang Bial Hmeichhe Zaipawl leh Kawnpui Pastor Bial Zaipawlte an zai.
Vawiin zing dar 6 atang khan Rorel leh inthlangin hmarveng kohhran Biak In ah hun hman a ni. Rorel hlan hian Pandalah Inkhawm buatsaih a ni bawk. Programme dang kan han tarlang e:
4/3/2011 Dar 1:30 Bible Study
Hruaitu: Pi Zokhumi Vankung, Ex-Chairman, Inkhawmpui Lian.
Tantu : Aibawk Bial
Zirtur: II Timothea
Zirtirtu: Pi PC Laltlani, B.A.,B.D.,M.Th.,B.Lib.Sc, Librarian ATC.
Zaipawl: Rawpuichhip Bial Hmeichhia, Phuldungsei Bial Hmeichhia.
Dar 6:30pm Jubilee hawnna
Hruaitu: Pi C. Lalneihkimi, Chairman, Inkhawmpui Lian.
Tantu: Thingdawl Bial.
Souvenior Release: Rev. P.C. Pachhunga, Synod Secretary.
Lawmthu sawi tawngtai rual
Golden Jubilee hawn leh thuchah: Rev.Zosangliana Colney, E/S i/c. Women
Zaipawl: Kolasib Hmarveng Bial Hmeichhia, Bukpui Bial Hmeichhia.
5/3/2011 dar 10:00 am. Jubilee lawmna
Hruaitu: Pi C. Lalneihkimi, Chairman Inkhawmpui Lian.
Tantu: Bawngkawn Bial
Free Sermon: Pi Lalzawmliani Ramhlun Venglai
Zaipawl: Lungdai Bial Hmeichhia
Zaipawlpui: Aizawl Bial infin.
Dar 1:30pm. Zaikhawmpui
Hruaitu: Pi Zokhumi Vankung
Tantu: Sangau Bial
Zaipawl: Bairabi Bial Hmeichhia, Tanhril Bial Hmeichhia.

Heti chin hi Programme chu tarlang phawt ila. Inkhawmpui boruak a nuam a, Inkhawmpui tan zan (Ningani zan khan Inkhawm hi mi 2480 kan ni.

Nia, Hmeichhe Inkhawmpui Lian hi mipa thenkhat thinlungah chuan a te maithei e. Mahse, hei hi erawh a chiang a, Mipa te leh Thalai rualte ai hian Nu ho hian an chanvo leh tihtur an ko a tla hi an ngaipawimawh zawk em aw kan ti a ni.



Kan Inkhawmpui dawn tur Pandal sak mek hi kan zo tep chu a ni tawh a, Pic kan tarlan khi chu Kar kal ta tir lama kan thawh chin a ni a, khami hnu khan a chungte pawh thui tak zar zawh a ni tawh a nia. Organising hruaitute leh Bial puipa ten an han thlirin, inkhawmpui an hman tawh dante an han sawiho a, kumin hi Jubilee lawmna hun a ni dawn bawk nen, kan Pandal tur hi te deuh dawn a an hriat avangin Chhuah lam leh tlak lamah hian feet 12 ve ve a zauh nise an ti a.



Pandal hma lam luhna kawngkhar hi chhim lam a ni a, Stage awmna lam tur hi hmarlam a ni a, a sir tawn tawnah hian feet 12 a zauh a ni dawn tihna a ni ber e. Tin, Pandal luhna lam(Chhimlamah) pawh hian feet 24 laia zauh tura ruahman a ni bawk a. Chuti anih chuan Pandal Area chu ahma aiin a zauin Inkhawmpui hmangtute pawh an leng hnem lehzual tawh ang.

Tunah Pic kan hmuh mek hi A dung feet 150, A vang feet 145 a ni a, a dung aiin a vang a zau zawk dawn a nih hmel! Mi leng tur zat hi kan beisei dan leh chhut dan chuan Pandal chhungah hian mi 4500/- vel leng tura ngaih a ni.

Mahse, tuna a zauhna tur nen hian chuan mipui tam zwk a len theih a beisei awm a. palai lokal tur pawh thahnem ngai lehzual turin kan insawm e.

Inkhawmpui Palai lokal turte hriat atan

Kawnpui khua hi In sang chuang zet kan ni ve tawh a, Kolasib District-ah chuan a khaw lian pawl leh Sub-Division Headquarter kan ni bawk a ni. Tin a khaw thleng hi a remin a pharh tha a mikhualte pawhin nuam an tih chhan ber pawh a ni ve fo thin.

Aizawl lam atanga ilokal chuan NH54 leh Lungdai lam kawng inpawhna lai tak i rawn thlen khan Kawnpui ilo lut tan dawn chiah a, Sairangpeng ti a sawi thin a  ni a, Presbyterian Branch Church pakhat a ding ve mek a, Hetah hian Inkhawmpui palai lokalte tan Advance Counter alo awm ang. Advance Counter-ah hian kan hruaitute leh School naupang an lo awm ang a, in chuanna Motor-ah khan School Naupang pakhat an lo chuang ve zel ang. Tichuan in thlenna Counter turah harsatna awm hauhlo leh mi zawh buai ngailo in in lo thleng thei ang.

I lokal zel ang a, In a awm chhunzawm tawh dawnlo emaw ti a, i thlir i thlir hnuah, Kawnpui Banglaveng i lo thleng ang a, Banglaveng dawt chiahah hian Kawnpui Vengthar alo awm leh ang. Banglaveng leh Vengthar te hi Vengpahnih ni mahse Kohhran khatah lawi in Kohhran hmingah chuan Dinthar Kohhran tih hming hi kan pu mek a ni.

Kawnpui vengthar chuanchung lam, NH54 road chhak lam zawng hi Chhimveng chin a ni a, Ist. IR Batallion awmna Mualvum kal tur chuan Chhimveng hi i kal tlang ngei a ngai ang.

Vengthar leh Chhimveng i kal pelh chiah khan Venglai i lo thleng ang a, chu chu Inkhawmpui Pandal awmnaveng a ni tih theihnghilh lo la. Venglai i kal pelh hnuah Veng dang pakhat Kawnpui Hmarveng alo awm ang a, chu chu Kawnpui khawchhung veng hrang hrang zinga veng tawp ber a ni ang.

Veng tinah hian Counter 2 zel awm tura ruahman a ni a, Traffic & security lamin Motor dahna hmun tur leh Motor an khuahkhirhna te Mipui tam zawk kan zalenna tur a ni tih hria a, min zawm sak hram hram turin kan in beisei bawk a.

Heng zawng zawng aia kan duh ber leh kan tawngtaina ber chu Chhung tina khawmpui palai(Mikhual) thleng ten Lal Isua neitu an ni ngei mai tiin min hre zui se tih hi a ni.

Pandal Ruangam a lang tan e

Kohhran hrang hrang ten a ni inchhawkin Pandal sak hnatlang hi kan nei thin a, Kawnpui khawtlang mipuite kan tanrualna a tha a, He Hmeichhe inkhawmpui Lian thleng tur hian kan phur tlang hle  a ni.

Hlim tlang taka Inkhawmpui kan hman theih nan i tawngtai mawlh mawlh ang u.

Lo kal ve ngei turin kan sawm che u

Zoram Hmeichhe Inkhawmpui Lian 2011 chu kan hma lawk Dt.3 - 6.March.2011 hian kan lo thleng dawn ta reng mai a. He Inkhawmpui Lian thleng tur hian theih tawpin Kawnpui khawtlang kan lo inbuatsaih a. Kum kalta atang tawh khan theih tawp chhuahin chhung tinte kan inpuahchah mup mup tawh a ni.

KTP General Conference kan thlen kum te leh YMA General Conference kan thlen kumte khan mikhualte leh a thlengtu Kawnpui mipuite harsatna thlentu ber chu TUI AVANG em em mai kha a ni tih a kalte chuan kan hre theuh ngei ang. Mahse, tunah chuan hei kan khaw bul hnai tak a Lui Lian tak 'Tuitun' tui chu PHE te hmalakna zarah kan kawtlai leh mahni inchhungah te a haw ta hiau hiau mai. Tui lamah chuan harsatna kan nei tawhlo ang tih inkhawmpui a lokal tur zawng zawng te hriat ngei chi a ni ang.

Tin, Kawnpui hi a khawthleng a nuamin, Nu Upa leh kum uaithla lam tan pawh a lawilen a nuam a, kawng chhuk chho lutuk leh kal vel harsatna hmun engmah a awmlo nia.

Kum dangah chuan March thla hi chuan Thosi a awm tan deuh tawh thin a, fimkhur thuhlaah Inkhawmpui palai lokal zawng zawng ten Thosilen keng theuh turin kan inchah a ni e.

A tawp berah chuan, he Blog  hi 2011 Zoram Hmeichhe Inkhawmpui Lian Organising Committee hnuaia Information & Publicity Sub-Committee te buatsaih a ni a,  Inkhawmpui chhunga thil thleng leh inkhawmpui chanchinte, Thlalak chihrang hrangte update reng tum a ni a, tluang taka kan kal zel theih nan minlo tawngtaipui thin dawn nia.